Das si mir

Wee üs nid kennsch hesch e Biudigslücke. Mir si e Fasnachtsclique us Herzogebuchsee wo am 23. März 2024 im Joker's z'Buchsi beschlosse het, e Verein z'gründe. Aktuell setze mer üs zäme us 13 Aktivmitglieder. Wie scho die letschte zwöi Jahr simer o im 2026 wieder z'Buchsi am Fasnachtsumzug mit üsem Wage drbi. Am Tag druf gömer de no uf Wange und ei Wuche später uf Huttwil.

Mäud di bi üs we dä legendär Samsti nächst Jahr mit üs wosch erläbe. Für Buchsi z'ungerstütze, leistemer jedes Jahr ou e Vereinsisatz ir Region, so wie das Jahr ar Bar vom Oberaargouische Schwingfescht z'Inkwil. We du üsi Hiuf are Bar oder im Parkdienst vo dim Fest chasch bruche, de schrib üs ds doch i üsem Kontaktformular.

Rückblick 2025

Nach chli meh aus drü Mönet Vorbereitig heimer am 8. März 2025 mit knapp 30 Kolleginne u Kollege a üsem erste Umzug für das Jahr mitgmacht. Üse Wage heimer zumne fahrende Après-Ski gmacht und so o fürne ordentleche Saisonabschluss im Mittuland gsorgt. O Kostümtechnisch heimer gluegt dsmer zu däm Motto passe u hei üs Wagebouer entsprächend mit Discoheume usgstattet. Aui wo mit üs am Umzug hei teilgno hei sech äbefaus passend agleit und so für chli Stimmig ufem Wage gsorgt.

Für s'Potential vo däm fahrende Chalet nid z'verschwände heimer im Aschluss a Umzug für aui Beteiligte e Afterparty organisiert und i abe ine gfiiret. Einisch meh es grosses Merci a aui wo drbi si gsi u ds o nächst Jahr wider wärde si, sowie a aui wo üs dür verschideni Sponsorings d'Organisation vo däm Ganze chli eifacher gmacht hei! Abschliessend het üs dr Bume us sine Ufnahme es Video gschnitte und üs so e Erinnerig dä warm Früehligsnami gschaffe. Lueg mau bi ihm verbi, es lohnt sech!